ხორვატიის საფეხბურთო ნაკრების მცველის - დინო დრპიჩის ცოლი, ნავეს ცელსიუსი უკვე ერთ წელზე მეტია, რაც მუსიკალური ბიზნესით დაინტერესდა და ათენში საკუთარი მუსიკალური სტუდიაც გახსნა. ამასთან ერთად, ცელსიუსმა თავადაც დაიწყო სიმღერა.
ამ მეტად უცნაური გვარის მქონე ქალის პოპულარობა ბოლო დროს იმდენად გაიზარდა, რომ ამასწინათ, რამდენიმე ცნობილმა ბერძენმა მომღერალმა მის სტუდიაში სიმღერების ჩაწერის სურვილი უკვე გამოთქვა. ამ ამბავში უცნაური არაფერი იქნებოდა, რომ არა ერთი საინტერესო ფაქტი - ნავეს ცელსიუსი მომღერლებს უფასოდ ემსახურება.
ყველამ კარგად ვიცით, რომ თანამედროვე საბაზრო ეკონომიკის პირობებში, უფასო პრაქტიკულად არაფერი არსებობს და უფულოდ ცნობილი ადამიანები არც კი იღიმიან. მაგრამ, ხორვატიის ნაკრების ფეხბურთელის ცოლი, როგორც ჩანს, მუსიკალურ ბიზნესს გართობის კუთხით უყურებს და ქმრის შემოსავალის ფლანგვა არად უღირს.